Созақ ауданында халықты жұмыспен қамту, жаңа жұмыс орындарын ашу және тұрғындардың табысын арттыру бағытында жүйелі жұмыстар атқарылуда. Аудандағы бұл жұмыстар «Өңірлік жұмыс орындарын құру картасы» аясында жүзеге асырылып, жыл басынан бергі 8 айдың қорытындысы бойынша бірқатар көрсеткіштерге қол жеткізілді.
2026 жылы облыс әкімдігі бекіткен «Өңірлік жұмыс орындарын құру картасы» бойынша Созақ ауданында барлығы 3064 жұмыс орнын құру жоспарланған. Оның ішінде 2398-і тұрақты, 666-сы уақытша жұмыс орны болуы тиіс.
8 айдың қорытындысы бойынша ауданда 2798 жұмыс орны құрылды. Оның 2131-і – тұрақты, 667-сі – уақытша жұмыс орындары.
Яғни уақытша жұмыс орындары бойынша жылдық жоспар орындалып қана қоймай, бір жұмыс орнына артық көрсеткішке қол жеткізілді. Ал тұрақты жұмыс орындарын құру бағытында да жоспардың басым бөлігі орындалып отыр.
Бұл – аудан көлемінде жұмыспен қамтуға бағытталған жобалардың нақты іске асып жатқанын көрсететін көрсеткіш. Өйткені жаңа жұмыс орнының ашылуы – бір адамның ғана еңбекке араласуы емес, оның отбасының тұрақты табысқа қол жеткізуіне мүмкіндік беретін әлеуметтік фактор.
Созақ үшін тұрақты жұмыс орындарын құрудың маңызы ерекше. Аудан аумағының кеңдігі, елді мекендердің орналасу ерекшелігі мен ауыл тұрғындарының басым болуы жұмыспен қамту мәселесін жергілікті жерде шешуді талап етеді.
Сондықтан аудандағы басты міндеттердің бірі – тұрғындарды тек уақытша еңбекке тарту емес, ұзақ мерзімді және тұрақты жұмыс орындарына орналастыру.
Тұрақты жұмыс орны азаматқа ай сайынғы табысын жоспарлауға, отбасының әлеуметтік жағдайын тұрақтандыруға және өзінің кәсіби әлеуетін дамытуға мүмкіндік береді. Ал аудан үшін бұл – экономикалық белсенді халықтың санын арттыратын маңызды көрсеткіш.
Об авторе
