Жартытөбе — ауылындағы кәсіптің тарихы кейде үлкен өндіріс орнынан емес, бірнеше мың балапаннан басталады.
Созақ ауданының Жартытөбе ауылында осындай бастама қолға алынды. Мұнда «JARTYTOBE BROYLER» ауыл шаруашылығы өндірістік кооперативі құрылып, бройлер тауықтарын өсіру, құс етін өндіру және өнімді жергілікті нарыққа шығару жұмыстары басталды.
Бұл — ауыл шаруашылығын әртараптандыруға бағытталған «Ауыл аманаты» бағдарламасы арқылы жүзеге асып жатқан жобалардың бірі.
Кәсіп иелері үшін мұндай жобаның мәні тек құс өсірумен шектелмейді. Ауылда өндіріс пайда болған сайын жұмыс орны, табыс көзі және жергілікті нарыққа ұсынылатын өнім көлемі де көбейеді.
Жоба аясында кәсіпкер құс өнімдерін қайта өңдеу бағытын дамыту үшін 30 млн теңге көлемінде жеңілдетілген несие алған. Қаражат өндірістік базаны қалыптастыруға, қажетті құрал-жабдықтар мен шаруашылықты жолға қоюға бағытталған.
Жартытөбеге барған аудан әкімі Мұхит Тұрысбеков кооперативтің жұмысымен танысып, құс өсіру және өнім өндіру барысын көрді. Кәсіп иесімен өндірістің қазіргі мүмкіндіктері мен алдағы жоспарын талқылады.
Аудан әкімінің айтуынша, ауылдағы кәсіпкерліктің дамуы жергілікті экономиканың тірі тамырына айналуы тиіс.
«Кәсіпкерлік дамыған жерде жұмыс орындары көбейіп, жергілікті өндіріс қалыптасады. Әсіресе ауыл тұрғындарының өз кәсібін ашып, мемлекет тарапынан беріліп отырған қолдау тетіктерін тиімді пайдалануы маңызды», — деді Мұхит Тұрысбеков.
Қазір кооперативте бройлер тауықтарын өсірумен қатар, құс еті мен жұмыртқаны өткізу жұмыстары жүргізілуде. Кәсіп иелері өндіріс көлемін ұлғайтып, өнім түрлерін көбейтуді көздеп отыр.
Бір бағдарламаның ауылдағы көрінісі
«Ауыл аманаты» бағдарламасының негізгі мақсатының бірі — ауыл тұрғындарының өз кәсібін бастауына мүмкіндік беру. Бірақ жеңілдетілген несие алған сәттен бастап ең күрделі кезең басталады: қаржыны өндіріске айналдыру, өнім шығару, оны өткізу және нарықта орнығу.
Жартытөбедегі кооператив үшін дәл осы кезең енді басталды.
Құс шаруашылығының бір ерекшелігі — өнімге сұраныстың тұрақтылығы. Алайда өндірісті тұрақты жүргізу үшін жем-шөптен бастап, құс күтімі, ветеринарлық бақылау, өнімді сақтау және өткізуге дейінгі тізбектің үзілмеуі қажет.
Сондықтан «JARTYTOBE BROYLER» үшін келесі міндет — өндіріс көлемін ұлғайтып қана қоймай, қалыптасқан шаруашылықты тұрақты кәсіпке айналдыру.
Ауылдағы жаңа өндірістің болашағы да осында.
Бүгін бірнеше қорадағы құс шаруашылығы болып көрінген жоба ертең тұрақты жұмыс орнына, жергілікті өнімге және ауыл экономикасының жаңа бір тірегіне айналуы мүмкін.
Ал оның қаншалықты үлкен өндіріске айналатынын уақыт көрсетеді.
Об авторе
